Seguro que moitos de vós tedes aínda vívidas memorias de cando un pau podía ser calquera cousa, de cando descubristes que unha caixa de cartón era o mellor xoguete do mundo, dos escenarios que faciades para o forte de Playmobil ou de facer « comidiñas» e experimentos culinarios con barro e outros miles de ingredientes. As pezas soltas son, dito de forma sinxela, iso mesmo: materiais de xogo non estruturado. Materiais, cousas, obxectos, utensilios, ferramentas, ingredientes... e xa veredes que moitísimo máis. Teñen en común unha cousa: sen ser NADA poden ser TODO. O único límite é a imaxinación de quen as usa. Pezas soltas. O xogo infinito de crear é un libro de fin aberto, un inicio, un reset, unha porta, unha ferramenta… E, sobre todo, unha provocación ao xogo, á experimentación e á creatividade. Benvidos ao universo das pezas soltas! Gozádeo moito. «Un bo xoguete é aquel que, sen ser nada en concreto, pode ser todo.» Francesco Tonucci.