Ao chegar a primavera, a natureza esperta lentamente e as noites vólvense máis cálidas. Cando parece que todos dormen, en realidade pasan moitas cousas no xardín. Que gran oportunidade de observalas! Este álbum guíanos sixilosamente a través dunha noite de bo tempo. A pesar da escuridade, descubriremos moitas cousas se acendemos unha lanterna. E sen axuda dela, prestando un pouco de atención, veremos aterrar un vagalume, cuxa presencia normalmente só notamos polo seu pequeno e brillante baile nocturno, e mesmo o brinco inesperado dun saltamontes. A medida que vaia amencendo iremos notando o cansazo, pero ansiaremos a próxima noite.